Home: 2016

Wednesday, March 2, 2016

កូនសោទាំង ៩ ដើម្បីជោគជ័យក្នុងជីវិតការងារពីលោក Grant Cardone អ្នកប្រឹក្សាយោបល់អាជីវកម្ម

កូនសោទាំង ៩ ដើម្បីជោគជ័យក្នុងជីវិតការងារពីលោក Grant Cardone អ្នកប្រឹក្សាយោបល់អាជីវកម្ម

លោក Grant Cardone អ្នកជំនាញខាងប្រឹក្សាយោបល់អាជីវកម្ម និង លើកទឹកចិត្ត Forbes.com

លោក Grant Cardone ជាអ្នកមានវិជ្ជាជីវៈខាងប្រឹក្សាយោបល់ អាជីវកម្ម និង ការលើកទឹកចិត្តផងដែរ បន្ថែមពីនេះ លោកក៏ជាអ្នកនិពន្ធសៀវភៅដ៏ល្បីល្បាញ។ ខាងក្រោមនេះជា ដំបូន្មានខ្លះពីលោក Grant Cardone ដើម្បីបង្កើតជីវិតជោគជ័យក្នុងវិស័យការងារ។

១) ភាពជោគជ័យគឺជាកាតព្វកិច្ចរបស់អ្នក ៖ បើតាមលោក Grant Cardone ភាពជោគជ័យគឺជាកាតព្វកិច្ច តួនាទី និង ទំនួលខុសត្រូវដែលមនុស្សគ្រប់រូប ត្រូវតែធ្វើ ព្រោះបើអ្នកគ្មានឆន្ទៈ ក្នុងការធ្វើវាទេនោះ ភាពជោគជ័យគឺមិនអាចកើតឡើងលើខ្លួនអ្នកបានឡើយ។

២) ត្រូវចេះបង្កើតការចរចាមួយប្រកបដោយអាទិភាព ៖ ការចរចាប្រកបដោយអាទិភាពត្រូវបានលោក Grant Cardone រៀបរាប់ថាជាវិធីមួយក្នុងការបង្កើតចំណូល និង ការវិនិយោគឲ្យឆ្ពោះទៅមុខ ព្រោះការចរចាជាមួយដៃគូពាណិជ្ជកម្ម ឬ អតិថិជនអ្នក វាពិតជាមានសារសំខាន់ណាស់ ដើម្បីធ្វើឲ្យការចរចានោះពោរពេញដោយសារសំខាន់ចំពោះពួកគេ។

៣) ត្រូវប្រឹងប្រែងឲ្យអស់ពីសមត្ថភាព ៖ ការប្រឹងប្រែងឲ្យអស់ពីសមត្ថភាព ឲ្យអស់ពីសមត្ថភាពក្នុងការធ្វើអ្វីមួយឲ្យចេញជាលទ្ធផលមិនគួរឲ្យជឿ អាចជួយធ្វើឲ្យអ្នកបង្កើនគុណតម្លៃខ្លួនឯង និង ភាពជឿជាក់ពីមនុស្សនៅជុំវិញខ្លួនកាន់តែច្រើន។

៤) មិនត្រូវខ្វល់ខ្វាយជាមួយមនុស្សអវិជ្ជមាននៅជុំវិញអ្នកនោះឡើយ ៖ លោកGrant Cardone រៀបរាប់ថា ឧបសគ្គដ៏ធំបំផុតរបស់មនុស្ស គឺមនុស្សអវិជ្ជមាននៅជុំវិញខ្លួនឯង នៅពេលដែលអ្នកសម្រេចចិត្តធ្វើអ្វីមួយគេតែចូលចិត្តដាក់សម្ពាធផ្លូវអារម្មណ៍មកលើអ្នក ច្រើនជាងផ្តល់ដំណោះស្រាយឲ្យអ្នក ដូច្នេះអ្នកគួរជៀសវាង ចេញឲ្យឆ្ងាយពីមនុស្សទាំងនេះ។

៥) មិនត្រូវធ្វើឲ្យខ្លួនឯងជាមនុស្សអវិជ្ជមាន ៖ លោក Grant Cardone ផ្តល់ដំបូន្មានថា នៅពេលដែលអ្នកធ្វើឲ្យខ្លួនឯងជាមនុស្ស អវិជ្ជមាន រាល់សកម្មភាពទាំងឡាយរបស់អ្នក គឺនាំទៅរកភាពអវិជ្ជមានទាំងអស់ ដូច្នេះអ្នកត្រូវចេះធ្វើឲ្យខ្លួនឯង ជាមនុស្សវិជ្ជមានជាប់ជានិច្ច។

៦) ត្រូវមានគោលដៅ ៖ លោក Grant Cardone ថ្លែងថាមានគោលដៅ គឺមានលទ្ធផល ដូច្នេះបើអ្នកចង់បានលទ្ធផលដែលខ្លួនចង់បាន អ្នកត្រូវចេះកំណត់គោលដៅឲ្យខ្លួនឯង ថាអ្នកចង់បានអ្វីខ្លះសម្រាប់ថ្ងៃនេះ។

៧) ត្រូវតែមានជំនឿលើខ្លួនឯង ៖ មានជំនឿលើខ្លួនឯង គឺជាការបង្កើតភាពជឿជាក់លើសមត្ថភាព ខ្លួនឯងដើម្បីធ្វើរឿងអ្វីមួយ ឲ្យចេញជារូបរាងពិតប្រាកដ ព្រោះគ្មាននរណាម្នាក់ អាចបង្កើតភាពជឿជាក់ឲ្យអ្នក ក្រៅពីខ្លួនអ្នកជឿលើខ្លួនឯងនោះឡើយ។

៨) ធ្វើរឿងទាំងឡាយណាដែលជាភាពប៉ិនប្រសព្វរបស់អ្នក ៖ លោក Grant Cardone រៀបរាប់ថានៅពេលដែលអ្នកធ្វើរឿងដែលជាភាពប៉ិនប្រសព្វរបស់ខ្លួន ត្រូវនឹងសមត្ថភាពរបស់ខ្លួន វាជាកត្តាមួយដើម្បីជំរុញទឹកចិត្តអ្នកឲ្យធ្វើការងារនោះរហូតទទួលបានជោគជ័យ។

៩) មិនត្រូវបោះបង់ឡើយ ៖ រឿងមួយសំខាន់បំផុត ដើម្បីទទួលបានជោគជ័យ នោះគឺអ្នកមិនត្រូវបោះបង់ចោលនូវគោលដៅរបស់ខ្លួននោះឡើយទោះបីជាមានឧបសគ្គយ៉ាងណាក៏ដោយ ព្រោះការបោះបង់ គឺជាភាពបរាជ័យមួយដ៏ធំរបស់មនុស្សក្នុងការសម្រេចគោលដៅ។

Zong Qinghou ពីក្មេងធ្វើការក្នុងកសិដ្ឋានអំបិល ក្លាយជាសេដ្ឋីប្រាក់ពាន់លានដុល្លារ

Zong Qinghou ពីក្មេងធ្វើការក្នុងកសិដ្ឋានអំបិល ក្លាយជាសេដ្ឋីប្រាក់ពាន់លានដុល្លារ

លោក Zong Qinghouស្ថាបនិក ប្រធាន និង ជានាយកប្រតិបត្តិ ក្រុមហ៊ុន Hangzhou Wahaha Group www.welt.de

លោក Zong Qinghou គឺជាមហាសេដ្ឋី សហគ្រិន ជនជាតិចិនដ៏ល្បីល្បាញមួយរូប លោកគឺជាស្ថាបនិក ប្រធាន និង ជានាយកប្រតិបត្តិ ក្រុមហ៊ុន Hangzhou Wahaha Group ដែលជាក្រុមហ៊ុននាំមុខគេខាងផ្គត់ផ្គង់ភេសជ្ជៈនៅក្នុងប្រទេសចិន។ នៅដើមឆ្នាំ ២០១៦ នេះលោកត្រូវបានគេហទំព័រ Forbes ចុះផ្សាយថាលោកជាបុគ្គលមានជាងគេលើពិភពលោកក្នុងចំណាត់ថ្នាក់លេខ ១២៤ ជាមួយនឹងទ្រព្យសម្បត្តិចំនួនជាង ១១ ពាន់លានដុល្លារ។ តើមហាសេដ្ឋី លេខ ១២៤ ពិភពលោករូបនេះ មានប្រវត្តិ និង បទពិសោធន៍ធ្វើអាជីវកម្មដូចម្ដេចខ្លះក្នុងឆាកជីវិតរបស់លោក?

លោក Zong Qinghou កើតនៅឆ្នាំ ១៩៤៥ នៅក្នុងខេត្ត Zhejiang ប្រទេសចិន លោកទទួលបានការអប់រំតិចតួចបំផុត។ បន្ទាប់ពីបានបញ្ចប់ការសិក្សាថ្នាក់អនុវិទ្យាល័យ លោកបានទៅធ្វើការនៅក្នុងតំបន់ Zhoushan ក្នុងកសិដ្ឋានធ្វើអំបិលមួយកន្លែង។ នៅឆ្នាំ ១៩៧៩ លោកបានត្រលប់មកផ្ទះវិញដោយសាម្តាយរបស់លោកបានចូលនិវត្តន៍ពីគ្រូបង្រៀន។ បន្ទាប់មកទៀតលោកបានធ្វើដំណើរទៅកាន់ទីក្រុង Hangzhou ដោយនៅទីនោះលោករកការងារជា អ្នកបម្រើការងារក្នុងសាលាមួយកន្លែង ក្នុងមុខដំណែងមួយមិនសូវល្អដោយសារលោករៀនបានទាបពេក។

នៅក្នុងឆ្នាំ ១៩៨៧ លោកមានបំណងចង់បើកហាងលក់គ្រឿងទេសតូចមួយក្នុងសាលា នៅក្នុងស្រុក Shangcheng District ខេត្ត Hangzhou ដោយលោកលក់នូវទឹកដោះគោ។ ក្រោយមកទៀតលោកក៏បានបើកហាងលក់ទឹកដោះគោឆៅ ពោលគឺផលិតផលមិនទាន់សម្រេច មានឈ្មោះថា Wahaha។ ក្រោយមកទៀតលោក និង គ្រូចូលនិវត្តន៍ ពីរនាក់ផ្សេងទៀតបាន ខ្ចីលុយគចំនួន ១៤០ ០០០ យ័ន បានចាប់ផ្តើមផលិតផលសម្រេចផ្នែកទឹកដោះគោដើម្បីលក់ចែកចាយ។

ក្រោយមកទៀតលោកទទួលបានកិច្ចព្រមព្រៀងវិនិយោគជាមួយក្រុមហ៊ុន ផលិតម្ហូបអាហារចម្រុះមកពីប្រទេសបារាំងឈ្មោះ Danone បានធ្វើឲ្យក្រុមហ៊ុនក្លាយជាក្រុមហ៊ុន ផ្គត់ផ្គង់ ខាងភេសជ្ជៈធំដាច់គេនៅក្នុងប្រទេសចិន។ ក្រុមហ៊ុន Wahaha បានចូលរូមមូលធនវិនិយោគជាមួយក្រុមហ៊ុនបារាំង Danone ក្នុងទំហំទឹកប្រាក់ ៧០ លានដុល្លារ ដើម្បីចូលរួមបង្កើតក្រុមហ៊ុនបណ្តាក់ទុកចំនួន ៥ នៅក្នុងប្រទេសចិន នៅឆ្នាំ ២០០៧ ដែលជាហេតុធ្វើឲ្យ ក្រុមហ៊ុន Wahaha របស់លោក Zong Qinghou ក្លាយជាក្រុមហ៊ុនផ្គត់ផ្គង់ភេសជ្ជៈធំដាច់គេនៅក្នុងប្រទេសចិន។

លោកស្រី Angela Ahrendts អនុប្រធានជាន់ខ្ពស់របស់ Apple មានប្រាក់បៀវត្សរ៍ខ្ពស់ជាងគេបំផុតនៅអាមេរិកជិត ៨៣ លានដុល្លារក្នុងមួយឆ្នាំ

លោកស្រី Angela Ahrendts អនុប្រធានជាន់ខ្ពស់របស់ Apple មានប្រាក់បៀវត្សរ៍ខ្ពស់ជាងគេបំផុតនៅអាមេរិកជិត ៨៣ លានដុល្លារក្នុងមួយឆ្នាំ

លោកស្រី Angela Ahrendts អនុប្រធានជាន់ខ្ពស់របស់ Apple youtube.com

លោកស្រី Angela Ahrendts ដែលជាអនុប្រធានជាន់ខ្ពស់(senior vice president)ផ្នែកលក់រាយរបស់ក្រុមហ៊ុនបច្ចេកវិទ្យា Apple ត្រូវបានគេធ្វើចំណាត់ថ្នាក់ថា ជាប្រតិបត្តិជាន់ខ្ពស់ (Female Executive ) មានប្រាក់បៀវត្សរ៍ខ្ពស់ជាងគេបំផុតនៅអាមេរិក ដែលមានចំនួនជិត ៨៣ លានដុល្លារក្នុងមួយឆ្នាំ។

អតីតនាយកប្រតិបត្តិក្រុមហ៊ុនម៉ូដសំលៀកបំពាក់ Burberry Group Plc ដែលមានមូលដ្ឋាននៅទីក្រុងឡុងដ៍របស់អង់គ្លេសមួយនេះ ត្រូវបានផ្ដល់ប្រាក់ខែក្នុងចំនួន ៨២,៦ លានដុល្លារក្នុងឆ្នាំ ២០១៤កន្លងទៅនេះ។ នេះបើយោងតាមទិន្នន័យចេញផ្សាយធ្វើឡើងដោយគេហទំព័រ Bloomberg។

ក្នុងវ័យ ៥៤ ឆ្នាំ លោកស្រី Angela បានចូលមកធ្វើការក្នុងក្រុមហ៊ុនយក្សដ៏មានតម្លៃថ្លៃជាងគេបំផុតក្នុងពិភពលោកមួយនេះនៅខែ ឧសភា ឆ្នាំ ២០១៤ កន្លងទៅនេះ នឹងបានក្លាយជាស្ត្រីដំបូងគេដែលត្រូវបានផ្តល់តំណែងឲ្យទទួលខុសត្រូវលើការគ្រប់គ្រងផ្នែកលក់របស់ក្រុមហ៊ុនទាំងមូល។

ចំនួននេះនៅមិនទាន់រាប់បញ្ចូលប្រាក់រង្វាន់លើកទឹកចិត្ត និង អត្ថប្រយោជន៍ផ្សេងៗទៀតដែលលោកស្រីទទួលបានពីក្រុមហ៊ុននេះដែលសរុបទាំងអស់មានចំនួន ១០៥,៥ លានដុល្លារ។

ចំណែកឯលោកស្រី Marissa Mayer ជាប្រធានក្រុមហ៊ុន Yahoo ក៏ត្រូវបានគេធ្វើចំណាត់ថ្នាក់ផងដែរថា នាយកប្រតិបត្តិស្ត្រី (CEO) មានប្រាក់បៀវត្សរ៍ខ្ពស់ជាងគេបំផុតប្រចាំមហាអំណាចមួយនេះក្នុងចំនួន ៥៩,១ លានដុល្លារប្រចាំឆ្នាំ ២០១៤។

យ៉ាងណាមិញ បើយោងតាមសន្ទស្សន៍ចំណាត់ថ្នាក់ប្រាក់បៀវត្សរ៍លើស្រ្តីកំពូលៗចំនួន ៨ រូបរបស់គេហទំព័រ Bloomber (Bloomberg Pay Index) នាយកប្រតិបត្តិវ័យ ៣៩ ឆ្នាំរូបនេះស្ថិតនៅក្នុងលេខរៀងទី៣៕

សាកល្បងអនុវត្តន៍ចំណុចសាមញ្ញទាំង ៣ នេះដើម្បីធ្វើឲ្យខ្លួនឯងជាមនុស្សពូកែគិតពិចារណា

សាកល្បងអនុវត្តន៍ចំណុចសាមញ្ញទាំង ៣ នេះដើម្បីធ្វើឲ្យខ្លួនឯងជាមនុស្សពូកែគិតពិចារណា

រូបតំណាង www.istockphoto.com

១) សួរសំនួរ ៖ អ្នកដែលពូកែគិតពិចារណា គឺជាមនុស្សចូលចិត្តចាប់ផ្តើមដោយការសួរសំនួរ ស្តីអំពីររាល់អ្វីៗនៅចំពោះមុខរបស់ពួកគេ។ ពួកគេពិចារណា រកមូលហេតុ និង ផលជានិច្ច ព្រោះពួកគេយល់ថា នៅគ្រប់សកម្មភាពទាំងអស់ គឺសុទ្ធតែមានលទ្ធផលរបស់វាទាំងអស់ ហើយពួកគេគិតថា រាល់លទ្ធផលនៃការកើតទៅរួច គឺកើតចេញពីការសម្រេចចិត្ត នៅមុនពួកគេធ្វើវា ដូច្នេះការសួរនូវសំនួរ អាចជួយឲ្យអ្នករកវិធីមួយដ៏ត្រឹមត្រូវក្នុងធ្វើអ្វីមួយ។

២) ស្វែងរកព័ត៌មាន ៖ ការអង្កេត ការស្រាវជ្រាវ ជាពិសេសនៅលើបណ្ដាញអ៊ីនធឺណិត ដែលអ្នកអាចរៀនអ្វីៗបានស្ទើរតែគ្រប់រឿង។ ការសម្ភាសន៍មនុស្ស សួរសំនួរទៅកាន់អ្នកជំនាញ ឬ អ្នកដែលមានបទពិសោធន៍នៅជុំវិញខ្លួនអ្នក អាចធ្វើឲ្យអ្នកទទួលបានព័ត៌មាន និង គំនិត ផ្សេងៗគ្នាជាច្រើន ដែលនេះជាបច្ច័យ មួយជួយធ្វើឲ្យអ្នកសម្រេចចិត្តខ្លួនឯងប្រកបដោយភាពត្រឹមត្រូវ ឈ្លាសវៃ និង កាន់តែប្រសើរជាងមនុស្សដទៃ។

៣) ការទំនាក់ទំនងរកដំណោះស្រាយ ៖ មនុស្សដែលមាន ការគិតពិចារណាខ្ពស់ គឺមានការចាប់អារម្មណ៍ខ្លាំងក្នុងការរកដំណោះស្រាយ ច្រើនជាងការស្តីបន្ទោស ការរអ៊ូរទាំ ឬ ការនិយាយពីក្រោយខ្នងនរណាម្នាក់។ នៅពេលដែលអ្នកទទួលបាន ការសរុបរាល់អត្ថន័យ តាមរយៈការគិតពិចារណាហើយនោះ វាជាពេលដែលអ្នកត្រូវបង្ហាញពីចិត្តមេត្តាករុណា ការយល់ចិត្ត និង ការដោះស្រាយដោយសន្តិវិធី។

មហាសេដ្ឋីមានទ្រព្យសម្បត្តិច្រើនជាងគេបំផុតចំនួន ១០ រូបប្រចាំតំបន់អឺរ៉ុបនេះ រកចំណូលបានដោយរបៀបណា?

មហាសេដ្ឋីមានទ្រព្យសម្បត្តិច្រើនជាងគេបំផុតចំនួន ១០ រូបប្រចាំតំបន់អឺរ៉ុបនេះ រកចំណូលបានដោយរបៀបណា?

មហាសេដ្ឋីអេស្ប៉ាញ លោក Amancio Ortega revistapoder.lamula.pe

១) លោក Amancio Ortega ជាអ្នកមានបំផុតនៅក្នុងប្រទេស អេស្ប៉ាញ ហើយក៏បានស្ថិតនៅក្នុងបញ្ជី កំពូលអ្នកមានទាំង ១០ នៅទ្វីបអឺរ៉ុប ជាមួយនឹងទ្រព្យសម្បត្តិដ៏មហាសាល ។ លោកជាស្ថាបនិកក្រុមហ៊ុនលក់រាយ និង សំលៀកបំពាក់ស្បែកជើងម៉ាក Indetex Zara ដោយបានបង្កើតឡើងក្នុងទសវត្សឆ្នាំ ១៩៧០ ។ មកទល់នឹងពេលសព្វថ្ងៃនេះលោក Amancio Ortega មានទ្រព្យសម្បតិ្តសរុបដល់ទៅ ៦៤,៥ ពាន់លានដុល្លារ ។

២) លោក ស្រី Liiane Bettencourt គឺជាមហាសេដ្ឋីជនជាតិបារាំងមួយរូបដែលបានជាប់ឈ្មោះជាក្នុងបញ្ជីកំពូលអ្នកមានទាំង ១០ នៅអឺរ៉ុប ។ លោកស្រីជាម្ចាស់ក្រុមហ៊ុនក្រុមហ៊ុនថែរក្សាសម្ផស្សដ៏ធំ L’Oreal ដែលបង្កើតឡើងដោយឪពុករបស់លោកស្រី ហើយពេលបច្ចុប្បន្នលោកស្រីមានទ្រព្យសម្បត្តិសរុប ៤០,១ពាន់លានដុល្លារ

៣) លោក Georg Schaeffler មហាសេដ្ឋីអាល្លឺម៉ង់ គឺជាម្ចាស់ភាគហ៊ុននៅក្នុងក្រុមហ៊ុន Schaeffler Gruppe ដែលលោកកាន់កាប់ដល់ទៅ ៨០% នៃក្រុមហ៊ុន ហើយម្តាយរបស់លោក គឺលោកស្រី Elisabeth Schaeffler ជាម្ចាស់ភាគហ៊ុន ២០% នៃក្រុមហ៊ុននេះ ។ លោក Georg Schaeffler មានទ្រព្យសម្បត្តិសរុប ២៦,៩ ពាន់លានដុល្លារ ។

៤) លោក Stefan Persson សញ្ជាតិស៊ុយអែត ជាម្ចាស់ភាគហ៊ុនដ៏ធំនៃក្រុមហ៊ុនរចនាម៉ូតសំលៀកបំពាក់ H&M ដែលបង្កើតឡើងដោយលោក Erling Persson ជាឪពុក ជាមួយនឹងកូនប្រុស Kerl-Johan ។ សព្វថ្ងៃនេះលោក Persson គឺជាប្រធានគ្រប់គ្រងដែលលោកមានទ្រព្យសម្បត្តិដល់ទៅ ២៤,៥ ពាន់លានដុល្លារ ។

៥) លោក Giovanni Ferrero មហាសេដ្ឋីអ៊ីតាលី ជានាយកប្រតិបត្តិនៃក្រុមហ៊ុន Ferrero SpA ជាក្រុមហ៊ុនចែកចាយចំណីសត្វ ដែលពេលបច្ចុប្បន្នលោកមានទ្រព្យសម្បត្តិសរុប ២៣,៤ ពាន់លានដុល្លារ ។

៦) លោក Gerald Cavendish Grosvenor ជាមហាសេដ្ឋីមានបំផុតនៅចក្រភពអង់គ្លេស ហើយលោកក៏ជាសមាជិកសភាជាន់ខ្ពស់មួយរូបរបស់អង់គ្លេស ដោយលោកមានទ្រព្យសម្បត្តិគិតជាទឹកប្រាក់ ១២,៦ ពាន់លានដុល្លារ ។

៧) លោកស្រី Charlene de Carvalho-Heineken សញ្ជាតិហុល្លង់ ជាអ្នកស្នងមរតកនៃក្រុមហ៊ុនស្រាបៀ Heineken ហើយក្រុមហ៊ុនមួយនេះបង្កើតឡើងដោយឪពុករបស់អ្នកស្រីលោក Gerard Adriaan Heineken នៅចុងសតវត្សទី ១៩ សព្វថ្ងៃលោកស្រីជាគណៈគ្រប់គ្រង់ជាមួយនឹងទ្រព្យសម្បត្តិ ១១,៦ ពាន់លានដុល្លារ ។

៨) លោក Dietrich Mateschitz ស្ថាបនិកក្រុមហ៊ុន Red Bull គឺជាមហាសេដ្ឋីអូទ្រីសមានជាងគេបំផុតប្រចាំប្រទេសនេះ ដោយក្នុងនោះលោកកាន់កាប់ភាគហ៊ុនជិតពាក់កណ្ដាលនៃក្រុមហ៊ុន។ បច្ចុប្បន្ន លោកមានទ្រព្យសម្បត្តិ ១០,៨ ពាន់លានដុល្លារ ។

៩) លោក John Fredriksen គឺជាមហាសេដ្ឋីសញ្ជាតិន័រវែស។ លោក គឺជាអ្នកជំនួញប្រេងដ៏ធំ ក្នុងអំឡុងសង្គ្រាម អ៊ីរ៉ាក់ និង អ៊ីរ៉ង់ ជាមួយនឹងទ្រព្យសម្បត្តិចំនួន ១០,៦ ពាន់លានដុល្លារ។

១០) លោក Kjeld Kirk Kristiansen គឺជាមហាសេដ្ឋីដាណឺម៉ាក និង ជាប្រធានក្រុមហ៊ុន ផលិតគ្រឿងអេឡិចត្រូនិក Lego បង្កើតឡើងដោយជីតារបស់លោកឈ្មោះ Ole Kirk Christiansen ។ បច្ចុប្បន្នលោកមានទ្រព្យសម្បត្តិ ៩,៧ ពាន់លានដុល្លារ៕

អនុវត្តន៍ទម្លាប់ទាំង ៦ សាមញ្ញ ដើម្បីជួយបង្កើនភាពជោគជ័យឲ្យខ្លួនឯង

រូបតំណាង entrepreneur.com

១) ក្រោកពីព្រលឹម

បើតាមការស្រាវជ្រាវ របស់ សាលា Harvard បង្ហាញឲ្យឃើញថា មនុស្សដែលភ្ញាក់ពីព្រលឹម គឺជាមនុស្សដែលបានក្តោបយ៉ាណែននូវព័ត៌មានសំខាន់ប្រចាំថ្ងៃ។ ពួកគេអាចអានព័ត៌មាន រៀបចំផែកការការងារប្រចាំថ្ងៃ ហាត់ប្រាណ នឹងអាចបំពេញកិច្ចការងារផ្សេងៗបានជាច្រើន ជាឧទាហរណ៍ មានសហគ្រិនមហាសេដ្ឋីល្បី ដូចជាលោក Jack Dorsey នាយកប្រតិបត្តិក្រុមហ៊ុន Twitter លោក Tim Cook នាយកប្រតិបត្តិក្រុមហ៊ុន Apple សុទ្ធតែជាមនុស្ស ភ្ញាក់ពីព្រលឹម នៅមុនមនុស្សទូទៅទាំងអស់។

២) បង្កើនទំនុកចិត្តខ្លួន តាមរយៈការអនុវត្តន៍

នៅពេលអ្នកមានការអនុវត្តន៍កាន់តែច្រើន វានឹងជួយឲ្យអ្នកបង្កើតជំនឿលើខ្លួនឯង ថានឹងមានសមត្ថភាពអាចទទួលបានជោគជ័យ។ ត្រូវចាំថាបុគ្គលជោគជ័យតែងនិយាយប្រាប់ខ្លួនឯងថា ទំនុកចិត្តកើតតាមរយៈការប្រឹងប្រែងធ្វើការឲ្យអស់ពីសមត្ថភាព តាមរយៈភាពជោគជ័យ និង តាមរយៈភាពបរាជ័យផងដែរ។ ប៉ុន្តែនៅពេលដែលអ្នកមានទំនុកចិត្តកាន់តែទិញ នោះសកម្មភាពកាន់តែតិចដែលអ្នកប្រព្រឹត្ត និង លទ្ធផលកាន់តែតិចដែលអ្នកនឹងទទួលបានមកវិញ។

៣) ត្រូវមានភាពច្បាស់លាស់

ភាពច្បាស់លាស់គឺសំដៅ តើការងារមួយណាដែលអ្នកចង់ធ្វើ? តើវានឹងសម្រេចនៅពេលណា? ហើយតើលទ្ធផលដូចម្តេចដែលអ្នកចង់បាន? ការកំណត់ភាពច្បាស់លាស់ឲ្យខ្លួនឯងបែបនេះជួយធ្វើឲ្យអ្នកដើរលើផ្លូវទៅរកភាពជោគជ័យ និង មិនខ្ជះខ្ជាយពេលឥតប្រយោជន៍។

៤) ត្រូវគិតបែបវិជ្ជមាន

បើតាមការស្រាវជ្រាវ របស់សាកលវិទ្យាល័យ University of North Carolina រកឃើញថា នៅពេលដែលអ្នកមានអារម្មណ៍បែបវិជ្ជមាន ដូចជាការ រីករាយ រំភើប ភាពស្កប់ស្កល់ និង ការស្រលាញ់ វានឹងជួយឲ្យអ្នកមើលឃើញរាល់រឿងអ្វីៗទាំងអស់ក្នុងជីវិតអ្នកសុទ្ធតែជារឿងដែលអាចកើតឡើងទាំងអស់។ បន្ថែមពីលើនេះ អារម្មណ៍បែបវិជ្ជមាន ផ្តល់ឲ្យមនុស្សនូវលទ្ធភាពការបើកចិត្តឲ្យទូលាយ និង ផ្តល់ជម្រើសច្រើនដល់មនុស្ស។

៥) រៀនអភិវឌ្ឍផ្នត់គំនិតខ្លួនឯង

បើយោងតាមការស្រាវជ្រាវ ពីអ្នកចិត្តសាស្ត្រ នៃសាលា Stanford រកឃើញថា ភាពជោគជ័យរបស់បុគ្គលមួយចំនួនគឺកើតឡើង តាមរយៈការចេះអភិវឌ្ឍផ្នត់គំនិតរបស់ខ្លួន ដែលវាជាកត្តាជួយឲ្យពួកគេរៀនបានកាន់តែច្រើន ពីកំហុសខ្លួនឯង និង ធ្វើឲ្យពួកគេជឿថា ពួកគេមានទេពកោសល្យដ៏អស្ចារ្យដែលអាចសម្រេចរាល់គោលដៅដែលពួកគេបានកំណត់។

៦) រៀនស្រវាចាប់ទំនាក់ទំនងដែលធ្វើឲ្យអ្នកមានសុភមង្គល

នៅក្នុងការស្រាវជ្រាវរបស់សាលា Harvard រកឃើញថា មានសសរស្ដម្ភ ចំនួន ពីរ ដែលធ្វើឲ្យមនុស្សមានសុភមង្គល ទី១ គឺ ស្នេហា និង ការស្រលាញ់ ហើយទី២ គឺវិធីតស៊ូរស់នៅក្នុងជីវិត ដែលមិនត្រូវធ្វើឲ្យ ការស្រលាញ់ឃ្លាតចេញពីអ្នក។ ប៉ុន្តែរឿងសំខាន់បំផុតដែល ការស្រាវជ្រាវរកឃើញ ក្នុងជីវិតមនុស្ស គឺភាពមានទំនាក់ទំនងល្អ។

អានដំបូន្មានរបស់មហាសេដ្ឋីត្បូងពេជ្រ លោក Fred Mouawad ចំនួន ៥ចំណុច ដើម្បីជោគជ័យក្នុងជីវិតរបស់លោកអ្នក!

អានដំបូន្មានរបស់មហាសេដ្ឋីត្បូងពេជ្រ លោក Fred Mouawad ចំនួន ៥ចំណុច ដើម្បីជោគជ័យក្នុងជីវិតរបស់លោកអ្នក!

មហាសេដ្ឋីត្បូងពេជ្រ លោក Fred Mouawad Businessinsider

លោក Fred Mouawad គឺជាមហាសេដ្ឋីបរាំងដែលកំពុងកាន់កាប់ក្រុមហ៊ុនត្បូងពេជ្រដ៏ធំមួយនៅលើភពលោក។ លោកមានក្រុមហ៊ុនជាច្រើនផ្សេងទៀត ដែលសរុបទៅ គឺកាន់ក្រុមហ៊ុនសរុបនៅក្នុងដៃ ចំនួន៧ក្រុមហ៊ុន ហើយក្នុងនោះក៏មានវត្តមាននៅក្នុងប្រទេសថៃផងដែរ។ បច្ចុប្បន្ន លោក មានទ្រព្យសម្បត្តិសរុបប្រមាណ ១,១ ពាន់លានដុល្លារ។

ខាងក្រោមនេះ គឺជាអនុសាសន៍សំខាន់ៗពីមហាសេដ្ឋីវ័យ ៤៦ ឆ្នាំរូបនេះដែលជាគន្លឹះរួមចំណែកជួយឲ្យលោកអ្នកជោគជ័យ៖

១) កំណត់អំពីការងារអាទិភាព

មនុស្សភាគច្រើនបានចំណាយពេលជាច្រើនម៉ោង ដើម្បីធ្វើការងារ ប៉ុន្តែអ្វីដែលសំខាន់នោះគឺពេលខ្លះគ្មានបានសម្រេចអ្វីទាំងអស់។ មូលហេតុចំបងនាំឲ្យកើតបញ្ហានេះព្រោះពួកគេមិនទាន់កំណត់ឲ្យបានច្បាស់ថា អ្វីដែលសំខាន់ និង អ្វីដែលមិនសំខាន់ ដូច្នេះហើយបានជា ព្យាយាមធ្វើកិច្ចការជាច្រើនក្នុងពេលតែមួយ បណ្តាលឲ្យរឿងរ៉ាវកាន់តែស្មុគស្មាញឡើង។ សម្រាប់លោក Fred Mouawad លោកបានផ្តល់ដំបូន្មានថា ដើម្បីធ្វើកិច្ចប្រចាំថ្ងៃ ប្រកបដោយប្រសិទ្ធភាពខ្ពស់ អ្នកត្រូវចេះកំណត់អាទិភាពឲ្យបានច្បាស់។

២) ចំណាយពេលឲ្យច្រើនលើអ្វីដែលអ្នកចង់ធ្វើ

នៅក្នុងចំណុចនេះ មហាសេដ្ឋីរូបនេះមានប្រសាសន៍ថា ប្រសិនបើចង់សម្រេចលើកិច្ចការអ្វីមួយដែលអ្នកគិតថាសំខាន់នោះ គឺត្រូវតែចំណាយពេលវេលាឲ្យបានច្រើនតាមតែអាចធ្វើទៅបានទៅលើការងារនោះ។ ជាធម្មតាទេ រាល់ការធ្វើកិច្ចការអ្វីមួយតែងតែជួបបញ្ហាជាច្រើន ប៉ុន្តែសំខាន់ត្រង់ថា អ្នកពិតជាចង់ធ្វើវាឲ្យជោគជ័យដែរឬទេ។ ប្រសិនបើចង់ អ្នកត្រូវតែខិតខំធ្វើវាឲ្យអស់ពីលទ្ធភាព ទោះបីជាត្រូវចំណាយពេលវេលាច្រើនក្តី តែយ៉ាងហោចណាស់ប្រើរូបមន្ត ៨០ ទល់ នឹង ២០។ មានន័យថា ចំណាយពេលលើការងារដែលអ្នកចង់ធ្វើឲ្យបាន ៨០% ក្រៅពីនេះសម្រាប់ពេលវេលាដែលនៅសល់ ២០% គួរធ្វើអ្វីដែលមានប្រយោជន៍បន្ទាប់បន្សំ។

៣) វាយតម្លៃអំពីការងាររបស់អ្នក

វាជារឿងជៀសមិនផុតនោះទេ ដែលមនុស្សតែងមានភាពវិជ្ជមាន និង អវិជ្ជមានចំពោះការងារ។ ប៉ុន្តែចំណុចសំខាន់ដែលមនុស្សគ្រប់គ្នាត្រូវធ្វើនោះគឺត្រូវទទួលស្គាល់អំពីសកម្មភាពរបស់ខ្លួនថាតើកំពុងស្ថិតក្នុងស្ថានភាពប្រសើរ ឬ ក៏អន់ថយ។ មកដល់ចំណុចនេះ បើតាមការពន្យល់របស់មហាសេដ្ឋី Fred Mouawad ដើម្បីដឹងអំពីច្បាស់អំពីប្រសិទ្ធភាពការងារ អ្នកត្រូវតែរៀបចំការវាយតម្លៃជាប្រចាំ។ ការវាយតម្លៃលើខ្លួនឯងនេះអាចធ្វើឡើងតាមរយៈការសួរនាំមនុស្សជុំវិញខ្លួន និង តាមរយៈការប្រៀបធៀបលើលទ្ធផលនៃរបាយការណ៍ការងារកន្លងៗមក។

៤) ប្រើយុទ្ធសាស្ត្រផ្សេងៗគ្នា

លោក Fred Mouawad បានផ្តល់ដំបូន្មានបន្តទៀតថា ដើម្បីសម្រេចគម្រោង ឬ គោលដៅអ្វីមួយអ្នកត្រូវតែមានយុទ្ធសាស្ត្រច្បាស់លាស់។ ជាមួយគ្នានោះដែរ មិនមែនមានតែយុទ្ធសាស្ត្រមួយនោះទេ ដែលអាចធ្វើឲ្យអ្នកទទួលជោគជ័យ ព្រោះស្ថានភាពខ្លះវាទាមទារឲ្យយើងប្រើវិធីជាច្រើនទើបជោគជ័យ។ មានន័យថា បើវិធីនេះមិនជោគជ័យ អ្នកត្រូវប្រើវិធីផ្សេងទៀត ដើម្បីឲ្យប្រាកដថា អ្នកនឹងសម្រេចអ្វីដែលចង់បាន។

៥) កាត់បន្ថយការខ្ជះខ្ជាយពេលវេលា

សម្រាប់លោក Fred Mouawad បានឲ្យតម្លៃខ្លាំងទៅលើពេលវេលា។ វាពិតជាមានសារសំខាន់ខ្លាំងណាស់ដែលថា អ្នកត្រូវគ្រប់គ្រងវាឲ្យមានប្រសិទ្ធភាព។ ផ្ទុយទៅវិញ បើកាលណាមិនចេះគ្រប់គ្រង ឬ ប្រើពេលវេលាឲ្យបានល្អ ឬ មានតម្លៃនោះទេ អ្នកនឹងប្រឈមមុខនឹងការខ្ជះខ្ជាយពេលវេលាមិនខាន។ ដូច្នេះហើយ អ្នកត្រូវតែព្យាយាមជម្រុះចោលសកម្មភាពដែលអត់ប្រយោជន៍មួយចំនួន ដូចជា ប្រើទូរស័ព្ទច្រើនពេក លេងហ្គេមច្រើន ឬ សកម្មភាពមួយចំនួនទៀតជាដើម៕

ហេតុផលចំនួន ៤ នេះបញ្ជាក់ថា ហេតុអ្វីបានជាមនុស្សមួយចំនួនបាក់ទឹកចិត្ត?

ហេតុផលចំនួន ៤ នេះបញ្ជាក់ថា ហេតុអ្វីបានជាមនុស្សមួយចំនួនបាក់ទឹកចិត្ត? salon.com

មនុស្សគ្រប់គ្នាសុទ្ធតែចង់សម្រេចតាមសេចក្ដីប្រាថ្នារបស់ខ្លួន ប៉ុន្តែអ្វីដែលសំខាន់គឺ វាមិនមែនជារឿងងាយស្រួលនោះទេ ព្រោះគ្រាន់តែមានចិត្តចង់បាន មិនគ្រប់គ្រងឡើយ ពោលគឺត្រូវការសកម្មភាព និង ការតាំងចិត្តជាច្រើនទៀត។ ដោយសារតែបែបនេះហើយ បានជាមនុស្សជាច្រើនបានសម្រេចចិត្តបោះបង់អ្វីដែលខ្លួនចង់ធ្វើទាំងខកចិត្តបំផុត ឬ អាចនិយាយបានថា លែងមានទឹកចិត្តធ្វើទៀតហើយ។

ខាងក្រោមនេះ គឺជាឧបសគ្គមួយចំនួនដែលបំបាក់ទឹកចិត្តអ្នកមិនឲ្យបន្តការងារដើម្បីសម្រេចគោលដៅ៖

១)ដើរលើផ្លូវមិនប្រាកដប្រជា

អ្នកខ្លះតែងគិតចង់ធ្វើនេះធ្វើនោះមិនចេះចប់ ប៉ុន្តែមិនដែលធ្វើអ្វីឲ្យបានសម្រេចម្តងណាឡើយពោលគឺធ្វើបានបន្តិចក៏ឈប់ ក្រោយមកក៏ចាប់ផ្តើមវិញ បន្តិចក្រោយទៀតមកក៏ឈប់ធ្វើទៀត។ ពេលនិយាយហាក់ដូចជា ងាយខ្លាំងណាស់ប៉ុន្តែពេលចេញសកម្មភាពវិញ គឺនិយាយមិនចេញតែម្តង។

នេះគឺជា ដំណើរមិនច្បាស់លាស់ ឬ មិនប្រាកដប្រជាមួយ ដែលធ្វើឲ្យមនុស្សមិនអាចឈានដល់ចំណុចដែលចង់បាន។ នេះគឺជាការពិតមួយ ដែលមនុស្សភាគច្រើនជួបប្រទះ ធ្វើឲ្យពួកគេមិនអាចរក្សាកម្លាំងចិត្ត ដើម្បីបន្តការងារឡើយ។

២) ចង់បានអ្វីដែលងាយពេក

វាជារឿងធម្មតាទេ ដែលមនុស្សភាគច្រើនចង់បានអ្វីដោយងាយៗ ពោលគឺចង់ជោគជ័យ ដោយមិនបាច់ប្រឹង។ ប៉ុន្តែការពិតនៅត្រង់ថា រាល់លទ្ធផល ឬ ភាពជោគជ័យដ៏អស្ចារ្យទាំងអស់ មិនអាចកើតឡើងដោយគ្មានការខិតខំប្រឹងប្រែងយ៉ាងខ្លាំងក្លានោះទេ។ ដូច្នេះហើយបានជា មិនអាចទទួលបានលទ្ធផលអ្វីជាដុំកំភួនបាន។ នៅពេលមិនអាចទទួលបានលទ្ធផលល្អច្រើនដងពេក វាប្រាកដជាធ្វើឲ្យមនុស្សបាក់ទឹកចិត្ត និង លែងចង់ធ្វើអ្វីបន្តទៀត។

៣) គិតបែបអវិជ្ជមាន

ការគិតពិតជាមានសារៈសំខាន់ខ្លាំងណាស់ ព្រោះបើគិតថា អាចធ្វើបាននោះ លទ្ធផលអាចល្អ ឬ មិនល្អ ប៉ុន្តែបើគិតថាមិនល្អ ឬ ធ្វើបានកើតនោះ នាំឲ្យលទ្ធផលស្មើនឹងសូន្យតែម្តង។ ដូច្នេះហើយ បើទោះបីជាត្រូវប្រឈមនឹងបញ្ហាច្រើនប៉ុណ្ណាក៏ដោយ អ្នកមិនត្រូវគិត ខ្លួនមិនអាចធ្វើបាននោះឡើយ ហើយត្រូវតែសង្ឃឹមជានិច្ចរហូតដល់នាទីចុងក្រោយ។

៤) ចង់ផ្លាស់ប្ដូរលឿនពេក

ចង់ផ្លាស់ប្តូរអ្វីមួយ គឺមិនមែនជារឿងងាយស្រួលនោះឡើយ ព្រោះអ្វីៗបានក្លាយជាទម្លាប់ទៅហើយ។ មនុស្សភាគច្រើន នៅពេលដឹងថា សកម្មភាពរបស់ខ្លួនមិនល្អនោះ ក៏ចាប់ផ្តើមព្យាយាមផ្លាស់ប្ដូរភ្លាមៗឲ្យបាន១០០ ភាគរយតែម្តង។ វាជារឿងល្អដែលចង់ផ្លាស់ប្ដូរអ្វីដែលអាក្រក់ ប៉ុន្តែចំណុចសំខាន់ត្រង់ថា ការផ្លាស់ប្ដូរមិនមែនជារឿងងាយស្រួលឡើយ ដូច្នេះហើយបើព្យាយាមផ្លាស់ប្ដូរលឿនពេក នោះវាមិនអាចផ្តល់ផលល្អទេ ព្រោះមិនត្រឹមតែមិនអាចផ្លាស់ប្ដូរបានទេ ថែមទាំងបង្កើតបញ្ហាមួយផ្សេងទៀត នាំឲ្យបញ្ហាកាន់តែស្មុគស្មាញ៕

ការតស៊ូ និង ភាពជាអ្នកដឹកនាំមិនអាចកាត់ថ្លៃបានរបស់លោក Abraham Lincoln អតីតប្រធានាធិបតីទី១៦ អាមេរិក

ការតស៊ូ និង ភាពជាអ្នកដឹកនាំមិនអាចកាត់ថ្លៃបានរបស់លោក Abraham Lincoln អតីតប្រធានាធិបតីទី១៦ អាមេរិក

លោក Abraham Lincoln អតីតប្រធានាធិបតីទី១៦ អាមេរិក dailyfinance.com

ប្រសិនបើ គេនិយាយអំពីមេដឹកនាំល្បីល្បាញនៅជុំវិញពិភពលោក គេមិនអាចមើលរំលង លោក Abraham Lincoln អតីតប្រធានាធិបតីទី១៦របស់អាមេរិកបានឡើយ។ សម្រាប់សហរដ្ឋអាមេរិកវិញ គេចាត់ទុក Abraham Lincoln ជាមេដឹកនាំដ៏អស្ចារ្យមួយរូបក្នុងប្រវត្តិសាស្ត្ររបស់ខ្លួន ដែលបានដឹកនាំប្រទេសឆ្ពោះទៅរកការរីកចម្រើន និង មានវត្តមាននៅលើក្រដាសប្រាក់ ៥ ដុល្លារអាមេរិកទៀតផង។

កើតនៅក្នុងគ្រួសារក្រីក្រ

លោក កើតនៅថ្ងៃទី ១២ ខែ កុម្ភៈ ឆ្នាំ ១៨០៩ ក្នុងគ្រួសារកសិករនៅតំបន់ Hardin County នៃរដ្ឋ Kentucky។ ឪពុករបស់លោក ព្យាយាមបណ្តុះបណ្តាលកូនឲ្យក្លាយជាកសិករប៉ិនប្រសប់ម្នាក់ ប៉ុន្តែ Lincoln ហាក់ដូចជាមិនសូវពេញចិត្តនឹងជីវិតបែបនេះហើយ ព្រោះវាជាការងារដែលត្រូវចំណាយកម្លាំងច្រើន និង លំបាកខ្លាំង។

ការផ្លាស់ទីលំនៅទៅកាន់រដ្ឋ Indiana

ដោយសារតែមានជម្លោះដីធ្លីនៅតំបន់ដែលកំពុងរស់នៅ គ្រួសារទាំងមូលក៏បានសម្រេចចិត្តផ្លាស់ទីលំនៅទៅកាន់រដ្ឋ Indiana ក្នុងឆ្នាំ ១៨១៦។ ប៉ុន្តែនៅពេលរស់នៅទីនោះមិនបានប៉ុន្មានផង ម្តាយរបស់ Abraham Lincolnក៏បានស្លាប់ដោយសារពុលទឹកដោះគោ។ ក្រោយមកឪពុករបស់លោក ក៏រៀបការជាមួយនឹងនារីម្នាក់ទៀត ប៉ុន្តែ Lincoln ស្រលាញ់រាប់អានម្តាយចុងរបស់ខ្លួនដូចម្តាយបង្កើតអញ្ចឹង។ នៅពេលនោះ គ្រួសាររបស់លោកមានជីវភាពមិនល្អនោះឡើយ ដូច្នេះហើយសមាជិកគ្រួសារម្នាក់ៗបានព្យាយាមធ្វើការដោយកម្លាំងដើម្បីចិញ្ចឹមជីវិត។

អានសៀវភៅ ជំនួសឲ្យការចូលសាលា

ដោយសារតែមានជីវភាពលំបាក Abraham Lincoln មិនបានចូលសិក្សានៅសាលាជាប់លាប់ដូចក្មេងដទៃទៀតនោះទេ។ បើតាមឯកសារមួយចំនួនបញ្ជាក់ថា លោកបានចូលសាលាជាលក្ខណៈផ្លូវការ សរុបទៅប្រហែលមួយឆ្នាំប៉ុណ្ណោះ។ ប៉ុន្តែយ៉ាងណាក៏ដោយ លោកមិនដែលចុះចាញ់ត្រឹមនេះឡើយ ពោលគឺ លោក Lincoln បានជ្រើសរើសការអានសៀវភៅ ជំនួសឲ្យការចូលរៀននៅសាលាផ្លូវការ។ លោក បានស្វះស្វែងរៀនសូត្រយ៉ាងខ្លាំង បើទោះបីជាមិនអាចចូលសាលារៀនក្តី ដោយព្យាយាមខ្ចីសៀវភៅពីគ្រប់ទីកន្លែងដើម្បីផ្តល់ជាអាហារសម្រាប់ខួរក្បាល។

មិនដែលចូលរៀនសាលាច្បាប់ តែប្រលងជាប់មេធាវី

នៅពេលអាយុ២០ឆ្នាំ លោកចាប់អារម្មណ៍យ៉ាងខ្លាំងលើផ្នែកច្បាប់ ហើយក៏ស្វះស្វែងរកសៀវភៅជាច្រើនទាក់ទងនឹងច្បាប់ដើម្បីស្រាវជ្រាវ។ នៅពេលមានអាយុ២១ឆ្នាំលោកក៏បានធ្វើដំណើរទៅកាន់រដ្ឋ Illinois។ ទៅដល់ទីនោះលោកបានសម្រេចចិត្តថា ចង់សិក្សាផ្នែកច្បាប់ដើម្បី ក្លាយជាមេធាវីម្នាក់។ នៅក្នុងឆ្នាំ ១៨៣៦ លោកបានសម្រេចចិត្តចុះឈ្មោះប្រលងដើម្បីក្លាយជាមេធាវី បើទោះបីជាមិនដែលចូលសាលាក៏ដោយ។ នៅទីបំផុតលោក ក៏បានប្រលងជាប់ ដែលវាជារឿងដ៏អស្ចារ្យខ្លាំងបំផុត។ ក្រោយពីប្រលងជាប់ហើយ លោកក៏ទទួលបានអាជ្ញាប័ណ្ណដើម្បីក្លាយជាមេធាវី៕

សំនួរជីវិតទាំង ៧ ដែលអ្នកត្រូវរកចម្លើយឲ្យខ្លួនឯងមុនពេលឈានដល់វ័យ ៣០ ឆ្នាំ

សំនួរជីវិតទាំង ៧ ដែលអ្នកត្រូវរកចម្លើយឲ្យខ្លួនឯងមុនពេលឈានដល់វ័យ ៣០ ឆ្នាំ

រូបតំណាង businessinsider.com

១) ប្រសិនបើខ្ញុំស្លាប់នៅថ្ងៃស្អែក តើខ្ញុំមានអារម្មណ៍ពេញចិត្តនឹងជីវិតខ្ញុំពេលនេះឬទេ? ៖ អ្នកត្រូវចាំថាគ្មានពាក្យថាស្ដាយក្រោយឡើងក្នុងជីវិតមនុស្សដើម្បីចាប់ផ្ដើមសាជាថ្មីពេលអ្នកបរាជ័យ ហេតុដូចនេះអ្នកត្រូវចេះផ្លាស់ប្ដូរខ្លួនឯងចាប់ពីថ្ងៃនេះតទៅ។ ប្រសិនបើអ្នកមិនពេញចិត្តនិងជីវិតខ្លួនឯងពេលនេះទេ អ្នកត្រូវតែ ចំណាយពេលគិតឡើងវិញពីរបៀបដែលអ្នកប្រើប្រាស់ពេលវេលាខ្លួនឯង ព្រោះវាគ្មានអ្វីជាក់លាក់ឡើងនៅក្នុងជីវិតមនុស្ស។

២) តើអ្វីជាភារកិច្ចដ៏មានតម្លៃរបស់ខ្ញុំដែលត្រូវធ្វើ? ៖ នេះអាចជាសំនួរសំខាន់មួយសម្រាប់ជីវិតជាយុវវ័យរបស់អ្នក តើឥឡូវអ្នកអាចធ្វើអ្វីបានខ្លះដើម្បីជាប្រយោជន៍។ នៅក្នុងអាជីវកម្មវិញ តើអ្វីដែលអ្នកចង់បង្កើតឲ្យក្លាយជារបស់ផ្ទាល់ខ្លួនអ្នក ហើយវាមានតម្លៃប៉ុណ្ណា? នៅពេលដែលអ្នកអាចរកឃើញនូវអ្វីដែលជាលក្ខណៈពិសេសរបស់អ្នក ឬ ទេពកោសល្យរបស់អ្នក នោះអ្នកនឹងអាចក្លាយជាអ្នកជំនាញមួយពិតប្រាកដ។

៣) តើនរណាជាអ្នកដែលជំរុញទឹកចិត្តខ្ញុំខ្លាំងជាងគេ? ៖ អ្នកត្រូវចេះគិតដល់បុគ្គលជោគជ័យមួយណា មេដឹកនាំមួយណា សហគ្រិនរូបណា ដែលអ្នកស្រលាញ់ខ្លាំងជាងគេ ហើយ ចង់ក្លាយខ្លួនដូចពួកគេ ត្រូវចេះស្វែងយល់ពីជីវិតពួកគេ បទពិសោធន៍ មកធ្វើជាគំរូផ្ទាល់ខ្លួនអ្នក ដើម្បីផ្ដល់ក្ដីសង្ឃឹមឲ្យខ្លួន ដើម្បីបន្តចាប់យកក្ដីស្រមៃរបស់ខ្លួន។

៤) ហេតុអ្វីបានជាខ្ញុំត្រូវក្រោកនាពេលព្រឹកព្រលឹម? ៖ នេះជាការរំលឹកអ្នក តើអ្វីជាគោលបំណងរបស់អ្នក ដែលត្រូវតែតម្រូវឲ្យភ្ញាក់ពីព្រលឹម។ ចម្លើយសម្រាប់សំនួរនេះក៏មិនងាយស្រួលឆ្លើយនោះដែរ ប៉ុន្តែអ្នកនៅតែមានគោលបំណងច្បាស់លាស់នៅក្នុងខ្លួន នៅពេលដែលអ្នកមើលឃើញពីគោលបំណងនិងមើលឃើញពីខ្លួនឯងកាន់តែច្រើន អនុភាពដ៏អស្ចារ្យ ជាច្រើនកំពុងតែរងចាំអ្នក។

៥) តើខ្ញុំចំណាយពេលវេលាប៉ុន្មានក្នុងមួយថ្ងៃដើម្បីសិក្សា? ៖ អ្នកត្រូវចេះកត់ត្រាខ្លួនឯងតើអ្នកបានរៀនអ្វីខ្លះនៅថ្ងៃនេះ ហើយអ្នកចំណាយពេលប៉ុន្មានដើម្បីរៀនវា។

៦) តើអ្នកណាដែលខ្ញុំគួរស្រលាញ់ ហើយ តើខ្ញុំបានប្រាប់គេ ឬ បង្ហាញឲ្យឃើញថាខ្ញុំស្រលាញ់គេយឺតពេលឬទេ? ៖ អ្នកមិនត្រូវរំពឹងថាមនុស្សដ៏ទៃយល់ពីអារម្មណ៍របស់អ្នកឡើយ សូម្បីតែមិត្តភ័ត្តិ និង គ្រួសារពេលខ្លះពួកគេមិនអាចយល់ពីអារម្មណ៍របស់អ្នកនោះទេ។ អ្នកត្រូវតែចេះបង្ហាញឲ្យពួកគេឃើញថាអ្នក ស្រលាញ់ពួកគេប៉ុណ្ណា បារម្ភពីពួកគេប៉ុណ្ណា។

៧) តើអ្វីទៅជានិយមន័យនៃពាក្យជោគជ័យសម្រាប់ខ្លួនខ្ញុំ? នេះជាសំនួរមួយដែលអាចធ្វើឲ្យជីវិតមនុស្សគ្រប់រូបមានការផ្លាស់ប្តូរ ព្រោះនៅពេលដែលអ្នកអាចកំណត់និយមន័យពាក្យជោគជ័យឲ្យខ្លួនឯងហើយនោះ វាជាមគ្គុទ្ទេសក៍មួយជួយនាំផ្លូវអ្នក ក្នុងការបង្កើតការសម្រេចចិត្តធ្វើអ្វីមួយប្រកបដោយភាពត្រឹមត្រូវ។

គន្លឹះទាំង ៨ ដើម្បីបើកអាជីវកម្មឲ្យជោគជ័យពីសេដ្ឋីសហគ្រិន Peter Jones

គន្លឹះទាំង ៨ ដើម្បីបើកអាជីវកម្មឲ្យជោគជ័យពីសេដ្ឋីសហគ្រិន Peter Jones www.peterjones.com

លោក Peter Jones គឺជាសេដ្ឋីសហគ្រិន និង ជាអ្នកជំនួញមួយរូបជនជាតិអង់គ្លេស លោកគឺជាអ្នកវិនិយោគខាង ទូរស័ព្ទដៃ ទូរទស្សន៍ និង បណ្តាញប្រព័ន្ធផ្សព្វផ្សាយ។ តើអ្វីខ្លះជាគន្លឹះដើម្បីធ្វើឲ្យលោកជោគជ័យក្នុងជីវិតអាជីវកម្មនាពេលកន្លងមករបស់លោក។

១) ជំនួសភាពបរាជ័យ ដោយមតិវាយតម្លៃពីមនុស្សជុំវិញខ្លួន ៖ លោក Peter Jones រៀបរាប់ថាបរាជ័យគឺជាមេរៀនដែលអ្នកត្រូវដើម្បីភាពជោគជ័យរបស់ខ្លួន ហើយវិធីនៃការរៀនពីវាមនុស្សមានវិធីរៀងៗខ្លួនចំណែកលោកគឺរៀនតាមរយៈគំនិតវាយតម្លៃពីមនុស្សជុំវិញខ្លួនឯងលើបរាជ័យរបស់ខ្លួន។

២) ត្រូវមានទស្សនវិស័យ ៖ លោក Peter Jones ថ្លែងថា មិនថាក្នុងជីវិតផ្ទាល់ខ្លួន ឬ ក្នុងជីវិតអាជីវកម្មនោះទេ អ្នកត្រូវតែមានទស្សនវិស័យមួយច្បាស់លាស់ ព្រោះជាកត្តាសំខាន់សម្រាប់ចង្អុលបង្ហាញផ្លូវថាអ្នកគួរទៅកន្លែងណា ដោយវិធីណា។

៣) ធ្វើគ្រប់រឿងទាំងអស់ ៖ ធ្វើគ្រប់រឿងទាំងអស់ សំដៅទៅលើរឿងដែលអ្នកអាចធ្វើបាន ហេតុដូច្នេះនៅពេលដែលអ្នកធ្វើរឿងកាន់តែច្រើនដែលអ្នកអាចធ្វើបាន នោះវាបានបង្ហាញឲ្យកាន់តែឃើញច្បាស់ថាអ្នកជាបុគ្គលអស្ចារ្យមួយខុសពីមនុស្សដទៃ។

៤) ស្រាវជ្រាវពីគំនិតខ្លួនឯង ៖ លោក Peter Jones ពន្យល់ពីចំណុចនេះថា ស្រាវជ្រាវពីគំនិតខ្លួនឯងថាអ្នកកំពុងបង្កើតអ្វី បង្កើតឲ្យនរណា ហើយនៅកន្លែងណាដែលជាទីផ្សាររបស់អ្នក ហើយអ្វីដែលអ្នកបង្កើតនោះ វាត្រូវតាមតម្រូវការអតិថិជន នាពេលបច្ចុប្បន្ន និងនៅពេលអនាគតឬទេ ដែលនេះជាចំណុចមួយសំខាន់ នៅពេលចាប់ផ្តើមអាជីវកម្មដំបូង។

៥) គ្រប់គ្រងពេលវេលាខ្លួនឯង ៖ សម្រាប់ជីវិតសហគ្រិន រយៈពេល ១ នាទីៗ មានសារសំខាន់ណាស់សម្រាប់ពួកគេ ដូច្នេះអ្នកត្រូវតែស្វែងយល់ពីកិច្ចការងារណាដែលចាំបាច់បំផុត និង នាំទៅរកគោលដៅរបស់អ្នកបំផុតត្រូវធ្វើ ព្រោះវាអាចជួយសន្សំពេលវេលារបស់អ្នកបានកាន់តែច្រើន។

៦) ត្រូវអនុវត្តន៍ឲ្យបានច្រើនចំពោះរឿងអ្វីមួយដែលមិនទាន់ជោគជ័យ ៖ នៅពេលដែលអ្នកធ្វើរឿងអ្វីមួយមិនទាន់ជោគជ័យអ្នកត្រូវតែព្យាយាមអនុវត្តន៍បន្ថែមទៀត នូវក្នុងរបៀបមួយផ្សេងទៀត ដែលវាជួយធ្វើឲ្យអ្នកកាន់តែមានគំនិតច្នៃប្រឌិតក្នុងការបង្កើតអ្វីមួយចេញជារូបរាងក្នុងវិធីយ៉ាងច្រើនផ្សេងគ្នា។

៧) ត្រូវតែអនុវត្តន៍ ៖ លោក Peter Jones ផ្តល់ដំបូន្មានថា មិនខ្វល់អ្នកមានដើមទុនប៉ុណ្ណា មានគម្រោងល្អប៉ុណ្ណា មានយុទ្ធសាស្ត្រប៉ុណ្ណានោះទេ ដរាបណាអ្នកមិនបានអនុវត្តន៍ រាល់អ្វីៗទាំងអស់ដែលអ្នកបានគិត វាមិនអាចលេចចេញជារូបរាងបានឡើយ។

៨) រីករាយជាមួយអ្វីដែលអ្នកបានធ្វើ ៖ នូវពេលដែលអ្នកធ្វើរឿងដែលអ្នកស្រលាញ់ចូលចិត្ត វាធ្វើឲ្យអ្នកមានអារម្មណ៍ថានេះជាជម្រើសរបស់អ្នក នេះជាសេរីភាពរបស់អ្នក ទោះបីជាមួយសប្តាហ៍អ្នកធ្វើការងារ ៧០ ម៉ោងក៏ដោយអ្នកនូវតែរីករាយជាមួយការងារអ្នក ព្រោះវាជាអ្វីដែលអ្នកស្រលាញ់។

តើមហាសេដ្ឋី Nick Woodman ស្ថាបនិកក្រុមហ៊ុន GoPro មានប្រវត្តិយ៉ាងដូចម្តេចខ្លះក្នុងការបើកអាជីវកម្ម?

តើមហាសេដ្ឋី Nick Woodman ស្ថាបនិកក្រុមហ៊ុន GoPro មានប្រវត្តិយ៉ាងដូចម្តេចខ្លះក្នុងការបើកអាជីវកម្ម?

លោក Nick Woodman ស្ថាបនិក និង ជានាយកប្រតិបត្តិក្រុមហ៊ុន GoPro Forbes.com

លោក Nick Woodman គឺជាមហាសេដ្ឋីសហគ្រិន សញ្ជាតិអាមេរិក មួយរូបដ៏ល្បីល្បាញ តាមរយៈស្នាដៃការបង្កើតកាមេរ៉ាធុនតូច។ លោក Nick Woodman គឺជាស្ថាបនិក និង ជានាយកប្រតិបត្តិក្រុមហ៊ុន GoPro ដែលមកទល់នឹងពេលបច្ចុប្បន្ននេះ លោកមានទ្រព្យសម្បត្តិ ច្រើនជាង ១ ពាន់លានដុល្លារអាមេរិក នេះបើយោងតាមគេហទំព័រ Forbes។ តើមហាសេដ្ឋីរូបនេះមានប្រវត្តិយ៉ាងដូចម្ដេចខ្លះ ក្នុងដំណើរការបើកអាជីវកម្មរបស់លោក?

លោក Nick Woodman កើតនៅថ្ងៃទី ២៤ មិថុនា ឆ្នាំ ១៩៧៥ នៅក្នុងទីក្រុង Woodside រដ្ឋ California សហរដ្ឋអាមេរិក។ គ្រួសាររបស់លោកគឺជាសហស្ថាបនិកធនាគារ វិនិយោគ Robertson Stephens។ លោកបានបញ្ចប់ថ្នាក់បរិញ្ញាបត្រផ្នែកវិទ្យាសាស្ត្រកុំព្យូទ័រ ពីសាកលវិទ្យាល័យ University of California, San Diego ក្នុងឆ្នាំ ១៩៩៧។ ក្រោយពីចប់ការសិក្សាភ្លាម លោក Nick Woodman បានបង្កើតក្រុមហ៊ុនចំនួន ២ គឺ EmpoerAll.com លក់សម្ភារៈគ្រឿងអេឡិចត្រូនិក និង មួយទៀតជាកម្មវិធីហ្គេមលើគេហទំព័រ ដែលអ្នកលេងអាចឈ្នះប្រាក់ ប៉ុន្តែមិនបានទទួលជោគជ័យឡើយ។

ខណៈពេលដែលលោកបានចំណាយពេលដើរលេខនៅប្រទេស អូស្ត្រាលី និង ឥណ្ឌូណេស៊ី លោក Nick Woodman បានប្រើប្រាស់កាមេរ៉ា ថតរូបដែលមាន Len ទំហំ ៣៥ មីលីម៉ែត្រ ដើម្បីថតរូបភាពវីដេអូផ្សេងៗនាពេលដំណើរកម្សាន្តនោះ។ ពេលនោះលោកមើលឃើញថា អ្នកចូលចិត្តថតរូបដូចជារូបលោក ដែលចង់ថតរូប និង វីដេអូ ប្រកបដោយគុណភាព ពិតជាពិបាកណាស់ ព្រោះខ្លួនមិនអាចចូលទៅជិតសកម្មភាពដែលខ្លួនចង់ថត និង ពេលខ្លះគ្មានលទ្ធភាពគ្រប់គ្រាន់ដើម្បីទិញសម្ភារៈសម្រាប់ថតរូបថ្លៃៗ ដែលនេះជាហេតុធ្វើឲ្យលោកមានគំនិត ចង់បង្កើតកាមេរ៉ា ធុនតូចតែគុណភាពនៃការថតបានល្អ ទើបធ្វើឲ្យលោកបង្កើតក្រុមហ៊ុនមួយឡើងមានឈ្មោះថា GoPro។

កាមេរ៉ា GoPro ត្រូវបានលោក Nick Woodman បង្កើតឡើងជាមួយខ្សែក្រវាត់ដែលអាចពាក់កាមេរ៉ាជាប់នឹងខ្លួនបាន។ កាមេរ៉ា GoPro បង្កើតឡើងដំបូងជាមួយទំហំ Len ៣៥ មីលីម៉ែត្រ និងក្រោយមកទៀតបានអភិវឌ្ឍដោយបំពាក់ WiFi លើកាមេរ៉ានេះ ដើម្បីបញ្ជាការថតពីចម្ងាយ និង បានបន្ថែមកន្លែងដាក់ Micro SD សម្រាប់អ្នកចូលចិត្តថតរូបវីដេអូដំណើរកម្សាន្ត។ ក្រោយមកទៀត កាមេរ៉ា GoPro ត្រូវបានអភិវឌ្ឍឡើងដើម្បីបំពាក់លើរថយន្ត អាចចាប់រូបភាពបានច្បាស់ល្អទោះបីជារថយន្តបើកក្នុងល្បឿនមួយដ៏លឿនក៏ដោយ។

នៅក្នុងឆ្នាំ ២០០៤ ក្រុមហ៊ុនបានធ្វើការលក់កាមេរ៉ានេះទៅឲ្យក្រុមហ៊ុនជប៉ុនមួយនូវកាមេរ៉ាចំនួន ១០០ គ្រឿងដែលនេះជាដំណាក់កាលដំបូងនៃការលក់ដាច់បំផុត។ មកដល់ឆ្នាំ ២០១២ ក្រុមហ៊ុនបានលក់ដាច់អស់កាមេរ៉ារហូតដល់ទៅ ២,៣ លានគ្រឿង។ ចាប់តាំងពីពេលនោះមកលោក Nick Woodman ត្រូវបានគេអញ្ជើញឲ្យចូលរួមនៅក្នុងសន្និសីទផ្នែកបច្ចេកវិទ្យាជាច្រើនស្តីពីបទពិសោធន៍ និងគន្លឹះមួយចំនួនដែលធ្វើឲ្យលោកជោគជ័យ។

ទម្លាប់៩យ៉ាងរបស់បុគ្គលជោគជ័យតែងធ្វើមុនពេលចូលគេង

ទម្លាប់៩យ៉ាងរបស់បុគ្គលជោគជ័យតែងធ្វើមុនពេលចូលគេង gunnarfreyr

តើប្រិយមិត្តបានធ្វើអ្វីខ្លះមុនពេលចូលគេង? នឹកដល់សំណួរនេះ លោកអ្នកអាចចាប់ផ្តើមគិតមើលឡើងវិញពីអ្វីដែលលោកអ្នកបានធ្វើមុនពេលចូលគេងកាលពីយប់មិញ។ ទោះបីជាចម្លើយរបស់ប្រិយមិត្តចេញមកក្នុងរូបភាពបែបណាក៏ដោយ ការពិតនៃការលើកឡើងសំណួរនេះ គ្រាន់តែចង់បង្ហាញលោកអ្នកឲ្យស្វែងយល់ពីទម្លាប់មួយចំនួនរបស់បុគ្គលជោគជ័យមុនពេលគេងតែប៉ុណ្ណោះ។

ដូច្នេះ សូមប្រិយមិត្តសាកផ្ទៀងផ្ទាត់ទាំងអស់គ្នាមើល៍ថា តើទម្លាប់របស់អ្នក ដូចទៅនឹងទម្លាប់ ៩ យ៉ាងរបស់បុគ្គលជោគជ័យខាងក្រោមនេះឬយ៉ាងណា?

១) បែងចែកពេលវេលា

គ្មានឡើយភាពខ្ជះខ្ជាយពេលវេលាឥតប្រយោជន៍របស់បុគ្គលជោគជ័យ។ បុគ្គលប្រភេទនេះបានដឹងថា ការកំណត់ពេលវេលាធ្វើកិច្ចការប្រចាំថ្ងៃនីមួយៗឲ្យបានត្រឹមត្រូវ និងធ្វើឲ្យខ្លួនមានតម្លៃ អាចគោរពតាមផែនការរបស់ខ្លួន។ ពេលវេលាសម្រាប់ការងារ ការទទួលទានអាហារ ការជួបជុំគ្រួសារ មិត្តភក្ដិ លំហែកាយ ឬ ចូលគេងសុទ្ធតែត្រូវបានបែងចែកយ៉ាងត្រឹមត្រូវជាមុន ទើបអ្វីៗអាចសម្រេចបានតាមផែនការទាំងនេះ ក្រោយពេលខ្លួនក្រោកពីដំណេកនៅថ្ងៃស្អែក។

២) អានសៀវភៅ

បុគ្គលជោគជ័យនៅលើពិភពលោកភាគច្រើនចូលចិត្តអានសៀវភៅណាស់។ មនុស្សប្រភេទនេះ តែងចូលចិត្តអាន និង រៀនពីអ្វីដែលជាគំនិតរបស់អ្នកដទៃ។ តើអ្នកមានដឹងទេថា ការអានសៀវភៅ គឺជាផ្លូវកាត់មួយសម្រាប់អ្នកឆ្ពោះទៅរកជោគជ័យដែរឬទេ? បុគ្គលជោគជ័យទាំងនោះមានជាអាទិ៍មហាសេដ្ឋីអាមេរិក ប៊ីល ហ្គេត ចំណាយពេលអានសៀវភៅរហូតដល់យប់ជ្រៅអស់កម្លាំងចូលទៅគេងលក់តែម្តង។

៣) ចំណាយពេលវេលាជួបជុំសមាជិកគ្រួសារ ឬ មិត្តភក្ដិ

ជោគជ័យ កើតឡើងតាមរយៈការទំនាក់ទំនង។ ដូច្នេះហើយបានជាបុគ្គលជោគជ័យទាំងឡាយបានចំណាយពេលវេលាដ៏មានតម្លៃ ដើម្បីជួបជុំជាមួយគ្រួសារ និងមិត្តភក្ដិចែករំលែកចំណេះដឹង ក៏ដូចជាពិភាក្សាពីការងារជាដើម។ បុគ្គលជោគជ័យភាគច្រើនជ្រើសរើសថ្ងៃពុធរៀងរាល់សបា្តហ៍សម្រាប់ការជួបជុំជាមួយមិត្តភក្ដិ ហើយក្រៅពីនោះសម្រាប់ការជួបជុំជាមួយគ្រួសារ។

៤) រៀបចំគម្រោងសម្រាប់ធ្វើនៅថ្ងៃស្អែក

គម្រោងសម្រាប់ធ្វើនៅថ្ងៃស្អែក គឺជាផែនការសំខាន់មួយ ដែលបុគ្គលជោគជ័យត្រូវរៀបចំឡើងមុនពេលគេង។ បន្ទាប់មក គេត្រូវរៀបចំពីអ្វីដែលជាតម្រូវការសម្រាប់ត្រៀមខ្លួនសម្រេចផែនការនោះ ដូចជាការរៀបចំសំណុំឯកសារដែលពាក់ព័ន្ធ សំលៀកបំពាក់ត្រៀមទុកមុនជាដើម។

៥) ធ្វើសមាធិ

សកម្មភាពដ៏អស្ចារ្យមួយទៀតរបស់បុគ្គលជោគជ័យ គឺការធ្វើសមាធិ នូវអ្វីដែលពួកគេយល់ថា នឹងជួយធ្វើឲ្យសុខភាពផ្លូវកាយ និងផ្លូវចិត្តរបស់ខ្លួនមានស្មារតីរឹងមាំល្អអាចជៀសវាងបញ្ហា ឬសម្ពាធនានាមកលើរាងកាយបាន។ បើអ្នកអនុវត្តទម្លាប់នេះបាន ប្រសិទ្ធភាពនៃការគិតរបស់អ្នកនឹងផ្ដោតទៅលើអ្វីដែលអ្នកចង់ធ្វើ និងមិនធ្វើឲ្យអ្នកមានអារម្មណ៍រវើរវាយទៀតផង។ អ្នកអាចចំណាយពេលត្រឹមតែ ៥ ទៅ ១០ នាទីមុនពេលគេង គឺគ្រប់គ្រាន់ទៅហើយសម្រាប់ការសមាធិនេះ។

៦) មានចក្ខុវិស័យខ្ពស់លើផែនការសម្រាប់ថ្ងៃស្អែក

វិធីសាស្ត្រមួយដើម្បីត្រៀមខ្លួនរួចរាល់សម្រាប់អ្វីដែលនឹងកើតឡើងនៅថ្ងៃស្អែក គឺចក្ខុវិស័យរបស់បុគ្គលជោគជ័យ។ ផែនការ ឬ គម្រោងដែលនឹងត្រូវធ្វើនៅថ្ងៃស្អែក គឺជាគោលដៅវាយលុកសម្រេចឲ្យបានរបស់អ្នកជោគជ័យដោយទំនុកចិត្ត និង ភាពជឿជាក់ តាមរយៈការស្វែងរកមធ្យោបាយ ឬ គន្លឹះល្អៗ ឈានទៅដល់សម្រេចផែនការនោះ។ ដូច្នេះ សម្រាប់អ្នក អ្នកអាចចំណាយពេល៥នាទី ទៅ ១០នាទីរិះរកវិធីសាស្ត្រនានាសម្រាប់សម្រេចផែនការរបស់អ្នកនៅថ្ងៃស្អែក។

៧) សរសេរសមិទ្ធផលដែលសម្រេចបាននៅថ្ងៃនេះ

តើអ្នកបានសម្រេចសមិទ្ធផលអ្វីខ្លះនៅថ្ងៃនេះ? នេះជាសំណួរមួយរបស់បុគ្គលជោគជ័យតែងចោទសួរខ្លួនឯងមុនពេលចូលគេង។ វាអាចជាចម្លើយអវិជ្ជមានសម្រាប់អ្នក តែសម្រាប់បុគ្គលប្រភេទនេះត្រូវតែសម្រេចឲ្យបាន។ ការទទួលទានអាហារថ្ងៃត្រង់ ពេលល្ងាច ឬ អាចត្រលប់មកផ្ទះវិញបានទៀងទាត់ ចំណាយពេលវេលាដ៏មានតម្លៃសម្រាប់បង្កើនភាពស្និទ្ធស្នាលក្នុងគ្រួសារ នឹងធ្វើឲ្យបុគ្គលទាំងនេះគេងលក់ស្រួល។ បើលោកអ្នកមិនមានចំណុចខាងលើនេះទេ បញ្ជាក់ថា អ្នកត្រូវរៀបចំខ្លួនអ្នកឡើងវិញ។ លើកក្រោយអ្នកអាចសរសេរពីសមិទ្ធផល ៣ ក្នុងចំណោមសមិទ្ធផលចំនួន ៥ ដែលអ្នកសម្រេចបាននៅថ្ងៃនេះ ក៏គ្រប់គ្រាន់ដែរ។

៨) ធ្វើអ្វីឲ្យហើយនៅថ្ងៃនេះ

តើអ្នកធ្លាប់គិតទេថា បុគ្គលជោគជ័យជាមនុស្សខ្ជិលទុកការងារនៅគរជើងគ្នារកចេញជាសមិទ្ធផលមួយគ្មាន? ចុះអ្នកវិញយ៉ាងម៉េចដែរ? បើលោកអ្នកបំពេញការងារមិនអស់ពីដៃពីជើង ហើយទុកចោល អាងថាចាំថ្ងៃនេះ ឬ ថ្ងៃនោះ មួយឆាកជីវិតរបស់អ្នកប្រហែលនៅតែជាមនុស្សបរាជ័យដដែល។ នេះមិនមែនមានន័យថា បុគ្គលជោគជ័យទាំងអស់អាចធ្វើការងារសុទ្ធតែរួចរាល់នោះទេ តែបើការងារនោះសម្រេចមិនបាននៅថ្ងៃនេះ គេនឹងប្ដេជ្ញាថា នឹងធ្វើឲ្យហើយនៅថ្ងៃស្អែក។ ប៉ុន្តែ លោកអ្នកត្រូវចាំថា បុគ្គលជោគជ័យនៅលើលោកជាទូទៅតែងតែធ្វើអ្វីឲ្យហើយនៅថ្ងៃនេះ ទើបពួកគេអាចគេងលក់ស្រួលបាន។

៩) គេងឲ្យបានគ្រប់គ្រាន់

លោកអ្នកពិតជាធ្លាប់ស្ថិតក្នុងស្ថានភាពមួយដែលគេងមិនគ្រប់គ្រាន់នឹងធ្វើឲ្យអ្នកអស់កម្លាំង ងងុយគេង ធ្វើកិច្ចការអ្វីមិនបានសម្រេច ហើយមិនយូរមិនឆាប់នឹងមានជំងឺ និងបណ្តាលឲ្យសមត្ថភាពខួរក្បាលចុះខ្សោយជាមិនខាន។ ដូច្នេះ ដើម្បីទទួលបានជោគជ័យដូចបុគ្គលជោគជ័យនានា លោកអ្នកត្រូវគេងឲ្យបានគ្រប់គ្រាន់ទើបជាការប្រសើរ៕

បុគ្គល ៤ រូបសុខចិត្តឈប់រៀនទៅធ្វើជំនួញក្លាយជាមហាសេដ្ឋីមានលុយច្រើនបំផុត

បុគ្គល ៤ រូបសុខចិត្តឈប់រៀនទៅធ្វើជំនួញក្លាយជាមហាសេដ្ឋីមានលុយច្រើនបំផុត

ពីឆ្វេងមកស្ដាំ ៖ លោក Bill Gates , Larry Ellison , Mark Zuckerberg និង Mechael Del

នៅពេលដែលលោកអ្នកកំពុងសិក្សានៅមហាវិទ្យាល័យ លោកអ្នកមានឱកាសបានក្រេបជញ្ជក់យកចំណេះវិជ្ជាយ៉ាងច្រើនឥតគណនា។ មហាវិទ្យាល័យជាទីកន្លែងប្រមូលផ្ដុំនូវចំណេះដឹង និងមុខវិជ្ជាសិក្សាសម្រាប់និស្សិតសិក្សាមុខវិជ្ជាដែលខ្លួនពេញចិត្ត ហើយចាប់អាជីពអ្វីមួយដែលត្រូវនឹងសញ្ញាបត្រដែលបានរៀនចប់ជាស្ថាពរ។ ការសិក្សាពិតជាមានសារៈសំខាន់ណាស់សម្រាប់ការអភិវឌ្ឍខ្លួនឯងផង និងអភិវឌ្ឍសង្គមជាតិផង។ សមិទ្ធផលយ៉ាងច្រើនសន្ធឹកសន្ធាប់ និងបច្ចេកវិទ្យាទំនើប កើតមានពីការសិក្សារៀនសូត្រ។

ទោះជាយ៉ាងណាក្ដី នៅក្នុងពិភពលោកនេះ ក៏មានបុគ្គលមួយចំនួនអាចរកឃើញភាពជោគជ័យនៅក្នុងជីវិត និងមានទ្រព្យសម្បត្តិច្រើនមហាសាល ខណៈដែលអស់លោករៀនមិនបានចប់ថ្នាក់បរិញ្ញាបត្រជាស្ថាពរផង។ ខាងក្រោមនេះជាមហាសេដ្ឋីចំនួន ៥ រូបដែលមានប្រាក់រាប់សិបពាន់លានដុល្លារ ហើយបានឈប់រៀនកណ្ដាលទីពេលកំពុងសិក្សាថ្នាក់បរិញ្ញាបត្រ។

១- លោកប៊ីលហ្គេត (Bill Gates) ម្ចាស់ក្រុមហ៊ុន Microsoft

មានប្រាក់ជាង ៨០ ពាន់លានដុល្លារ (ឯកសារខ្លះថាលោកមានប្រាក់ជាង ៧៩ ពាន់លានដុល្លារ)

លោកប៊ីលហ្គេតកើតនៅថ្ងៃទី២៨ ខែតុលា ឆ្នាំ១៩៥៥ នៅរដ្ឋវ៉ាស៊ីនតោន សហរដ្ឋអាមេរិក។ លោកប៊ីលហ្គេតសិក្សាបរិញ្ញាបត្រផ្នែកវិទ្យាសាស្ត្រកុំព្យូទ័រនៅសាកលវិទ្យាល័យហាវើត (Harvard) ហើយក៏បានឈប់រៀនកណ្ដាលទី។ លោកប៊ីលហ្គេតជាបុគ្គលដែលមានបញ្ញាឈ្លាសវៃ និងមានចក្ខុវិស័យត្រឹមត្រូវ។ លោកយល់ថាលោកត្រូវរកស៊ីខាង Software ជាជាង Hardware ព្រោះលោកអាចរក្សាកម្មសិទ្ធិបញ្ញាខាង Software របស់លោកបាន។ ក្រោយមក លោកបានបបួលលោក Paul Allen ជាមិត្តសំឡាញ់ចាស់តាំងពីក្មេង ដើម្បីចូលហ៊ុនរកស៊ីខាងសរសេរកម្មវិធីកុំព្យូទ័រ។ អស់លោកទាំងពីរក៏បានឈប់រៀនកណ្ដាលទី ហើយបើកក្រុមហ៊ុន Microsoft។

២- លោកឡារីអេលីសឹន (Larry Ellison) ជាម្ចាស់ក្រុមហ៊ុន Oracle

មានប្រាក់ជាង ៥៤ ពាន់លានដុល្លារ

លោកកើតនៅថ្ងៃទី១៧ ខែសីហា ឆ្នាំ១៩៤៤។ លោកអេលីសឹនត្រូវគេចាត់ទុកជាបុគ្គលដែលពូកែខាងសរសេរ program និងក៏ជាអ្នករកស៊ីខាងអ៊ីនធឺណែតផងដែរ។ កាលរៀននៅថ្នាក់វិទ្យាល័យ លោកពូកែខាងមុខវិជ្ជាវិទ្យាសាស្ត្រ និងគណិតវិទ្យា។ ពេលប្រឡងជាប់សញ្ញាបត្រមធ្យមសិក្សាទុតិយភូមិ លោកបានចូលរៀននៅសាកលវិទ្យាល័យអ៊ីលីណយ (Illinois)។ រៀនបានពីរឆ្នាំ លោកក៏បានឈប់រៀន បន្ទាប់ពីម្ដាយចិញ្ចឹមរបស់លោកទទួលអនិច្ចកម្ម។ មួយឆ្នាំក្រោយមក លោកបានចូលរៀននៅសាកលវិទ្យាល័យឈីកាហ្គោ (Chicago)។ រៀនបានមួយឆមាស លោកក៏ឈប់រៀន។ ពេលនោះ លោកសល់ប្រាក់បន្តិចបន្តួចប៉ុណ្ណោះ ហើយក៏ទៅធ្វើការឲ្យគេសិន តាមក្រុមហ៊ុននានាអស់រយៈពេល ១០ ឆ្នាំ។ នៅឆ្នាំ១៩៧៧ លោកបានសហការជាមួយមិត្តភក្ដិម្នាក់ទៀត ចូលហ៊ុនគ្នាបង្កើតក្រុមហ៊ុន Oracle។ ក្រុមហ៊ុនរបស់លោកលក់ទាំង Hardware និង Software។ សព្វថ្ងៃ លោកឡារីអេលីសឹនជាមហាសេដ្ឋីលំដាប់ទី៥ពិភពលោក។

៣- លោកម៉ាកហ្សាក់ខឺបឺក (Mark Zuckerberg) ជាម្ចាស់ក្រុមហ៊ុនហ្វេសប៊ុក (Facebook)

មានប្រាក់ជាង ៣៤ ពាន់លានដុល្លារ

លោកម៉ាកហ្សាក់ខឺបឺកកើតនៅថ្ងៃទី១៤ ខែឧសភា ឆ្នាំ១៩៨៤ នៅរដ្ឋញីវយ៉ក សហរដ្ឋអាមេរិក។ លោកត្រូវគេចាត់ទុកថាជាមហាសេដ្ឋីវ័យក្មេង និងជាសហគ្រិនខាងអ៊ីនធឺណែតដ៏លេចធ្លោបំផុតនៅក្នុងពិភពលោកសម្រាប់ពេលបច្ចុប្បន្ន។ តាំងពីនៅវ័យក្មេង លោកមានចំណង់ចំណូលចិត្តខាងសរសេរ Software និងសរសេរកម្មវិធីហ្គែម (game)។ នៅថ្នាក់វិទ្យាល័យ លោករៀនពូកែបំផុតលើមុខវិជ្ជាមួយចំនួន រហូតដល់លោកអាចចូលរៀននៅសាកលវិទ្យាល័យហាវើត។ ពេលកំពុងរៀនឆ្នាំទីពីរ លោកបានសរសេរកម្មវិធីសម្រាប់ដំណើរការបណ្ដាញសង្គម (social network) ដែលបច្ចុប្បន្នត្រូវគេស្គាល់សឹងគ្រប់គ្នាថាហ្វេសប៊ូក (Facebook)។ លោកសម្រេចចិត្តថាត្រូវឈប់រៀនត្រឹមឆ្នាំទីពីរ ដើម្បីយកពេលបង្ហើយកិច្ចការសរសេរ software របស់លោក។

៤- លោកម៉ៃឃើលឌែល (Michael Dell) ម្ចាស់ក្រុមហ៊ុន Dell

មានប្រាក់ជាង ១៨ ពាន់លានដុល្លារ

លោកកើតនៅថ្ងៃទី២៣ ខែកុម្ភៈ ឆ្នាំ១៩៦៥ នៅរដ្ឋតិចសាស់ (Texas) សហរដ្ឋអាមេរិក។ លោកមានចំណូលចិត្តខាងធ្វើជំនួញតាំងពីលោកនៅវ័យក្មេងមកម៉្លេះ។ ដូចនេះ លោកប្រឹងធ្វើការក្រៅម៉ោងដើម្បីសន្សំលុយទុកបើកក្រុមហ៊ុន តាំងពីលោកនៅរៀនថ្នាក់វិទ្យាល័យ និងមហាវិទ្យាល័យ។ ពេលអាយុ ១៥ ឆ្នាំ លោកទិញកុំព្យូទ័រមួយគ្រឿង ហើយលោកក៏ចាប់ចិត្តនឹងការផលិតកុំព្យូទ័រជាខ្លាំង។ ពេលកំពុងសិក្សានៅសាកលវិទ្យាល័យតិចសាស់ លោកក៏បានឈប់រៀនកណ្ដាលទី ហើយបង្កើតក្រុមហ៊ុនតែម្នាក់ឯងតែម្ដងដែលមានឈ្មោះថាឌែល (Dell) ខាងផលិត Software និង Hardware និងលក់សេវាខាងថែទាំ និងដំណើរការ server ជាប្រភេទ cloud service។ ពេលបើកក្រុមហ៊ុនដំបូង លោកមានប្រាក់ ១០០០ ដុល្លារ៕

លក្ខណៈសម្បត្តិ ៤ នៃបុគ្គលមានប្រសិទ្ធភាពខ្ពស់ក្នុងការងារ ដែលអ្នកគួរស្វែងយល់

លក្ខណៈសម្បត្តិ ៤ នៃបុគ្គលមានប្រសិទ្ធភាពខ្ពស់ក្នុងការងារ ដែលអ្នកគួរស្វែងយល់

រូបតំណាង businessinsider.com

១) ពួកគេជាមនុស្សដែលស្គាល់ខ្លួនឯង

អ្នកមិនអាចទទួលបានជោគជ័យឡើយ ប្រសិនបើអ្នកមិនអាចរកឃើញនូវអ្វីដែលជាភាពខ្លាំងរបស់ខ្លួនឯង។ នៅពេលដែលអ្នកដឹងច្បាស់ពីខ្លួនឯង នូវនិយមន័យនៃភាពជោគជ័យរបស់អ្នក គឺការធ្វើកិច្ចការមួយដែលអ្នកដទៃធ្វើមិនបាន។

២) ពួកគេដឹងពីកន្លែងដែលពួកគេត្រូវទៅ

ប្រសិនបើអ្នកមិនមានទិសដៅដែលត្រូវដើរនៅក្នុងចិត្តរបស់ខ្លួននោះទេ ទោះបីជាអ្នកប្រឹងប្រែងធ្វើការងារទាំងថ្ងៃទាំងយប់ក៏ដោយ អ្នកមិនអាចដើរដល់គោលដៅដែលអ្នកចង់បានឡើយ។ ខុសពីមនុស្ស ដែលមានប្រសិទ្ធភាពការងារខ្ពស់ ពួកគេពួកគេតែងមានផែនទីចង្អុលផ្លូវឲ្យខ្លួនឯងជានិច្ច នេះជាហេតុនាំឲ្យពួកគេមិនខ្ជះខ្ជាយពេលឥតប្រយោជន៍។

៣) ពួកគេជាមនុស្សដែលមិនត្រូវការ សុំការអនុញ្ញាតពីអ្នកដទៃ

មនុស្សដែលមានប្រសិទ្ធភាពខ្ពស់ក្នុងការងារជាមនុស្ស ដែលមានចាប់ផ្តើមធ្វើមុនគេ នូវរឿងមួយដែលមនុស្សដទៃមិនធ្លាប់ដឹងពីមុន។ ពួកគេជាមនុស្សដែលចាប់ផ្តើមធ្វើរឿងអ្វីមួយ មុនពេលពួកគេទទួលបានចម្លើយត្រលប់មកវិញ ពួកគេចាប់ផ្តើមធ្វើមុនពេលពួកគេមានលុយ ពួកគេចាប់ផ្តើមធ្វើរឿងនូវពេលគ្មាននរណាម្នាក់ជឿលើពួកគេ ដូច្នេះការអនុញ្ញាតតែមួយគត់ដែលពួកគេត្រូវការ គឺការអនុញ្ញាតចេញពីចិត្តពួកគេផ្ទាល់ ដែលជំរុញឲ្យពួកគេបោះជំហានទៅមុខជានិច្ច។

៤) ពួកគេរៀនសូត្រ តាមរយៈការអនុវត្តន៍

មនុស្សដែលមានប្រសិទ្ធភាពខ្ពស់ក្នុងការធ្វើ ការងារ តែងធ្វើអ្វីមួយបានដោយភាពល្អឥតខ្ចោះ ដែលវាមិនមែនជារឿងចៃដន្យឡើយសម្រាប់ពួកគេ ហើយវាជាមធ្យោបាយតែមួយគត់ ល្អបំផុតក្នុងការរៀនសូត្រពីមេរៀនជាក់ស្តែងរបស់ពួកគេ។ នូវពេលបរាជ័យ បុគ្គលដែលមានប្រសិទ្ធភាពការងារខ្ពស់ជាមនុស្សដែលអនុវត្តន៍ម្តងហើយម្តងទៀត ដោយពួកគេយល់ថាវាល្អប្រសើរជាងការមកអង្គុយពិភាក្សា ដោយមិនអនុវត្តន៍។

សៀវភៅ ៧ ក្បាលជួយធ្វើឲ្យអ្នកកាន់តែឆ្លាតក្នុងវិស័យអាជីវកម្ម ដែលអ្នកគួរតែអាន

សៀវភៅ ៧ ក្បាលជួយធ្វើឲ្យអ្នកកាន់តែឆ្លាតក្នុងវិស័យអាជីវកម្ម ដែលអ្នកគួរតែអាន

សៀវភៅ ៧ ក្បាលជួយធ្វើឲ្យអ្នកកាន់តែឆ្លាតក្នុងវិស័យអាជីវកម្ម ដែលអ្នកគួរតែអាន businessinsider.com

១) សៀវភៅ The E-Myth ៖ និពន្ធដោយលោក Michael Greber ដោយនៅក្នុងសៀវភៅនេះលោករៀបរាប់អំពី គោលគំនិតតូចៗជាច្រើនស្តីពីរបៀបនៃការដំណើរការអាជីវកម្ម។

២) សៀវភៅ Good to Great ៖ និពន្ធដោយលោក Jim Collins ដោយពឹងផ្អែកលើការស្រាវជ្រាវក្នុងបណ្ដាក្រុមហ៊ុនជាច្រើននៅអាមេរិក ដោយសៀវភៅនេះបង្ហាញថា ហេតុអ្វីបានជាក្រុមហ៊ុនមួយចំនួនអាចបោះជំហានដ៏អស្ចារ្យពីល្អ ទៅកាន់ភាពកាន់តែល្អប្រសើរបន្ថែមទៀតខណៈពេលក្រុមហ៊ុនមួយចំនួនទៀតមិនអាចធ្វើ។

៣) សៀវភៅ Big Magic ៖ និពន្ធដោយលោកស្រី Elizabeth Gilbert ដោយសៀវភៅនេះរៀបរាប់ពីគំនិត តើមនុស្សគ្រប់រូបបង្កើតគំនិតទាំងអស់នេះចេញមកពីណា ហើយតើមនុស្សយើងអាចស្វែងរកនូវគំនិតដ៏មានអត្ថន័យចេញពី ក្នុងខ្លួនដោយរបៀបណា?

៤) សៀវភៅ The 7 Habit of Highly Effective People ៖ និពន្ធដោយលោក Stephen R. Covey ដែលរៀបរាប់ របៀបបង្កើតក្តីសង្ឃឹម និង ការលើកទឹកចិត្តឲ្យខ្លួនឯង ដើម្បីផ្លាស់ប្តូរជីវិតឲ្យកាន់តែប្រសើរឡើង។

៥) សៀវភៅ Start with Why ៖ និពន្ធដោយ Simon Sinek រៀបរាប់អំពី គំនិត និង លក្ខណៈសម្បត្តិដ៏អស្ចារ្យនៃភាពជាអ្នកដឹកនាំល្អ។

៦) សៀវភៅ Originals ៖ និពន្ធដោយលោក Adam Grant ដែលលោកបានពន្យល់បង្ហាញពីរបៀបដែលធ្វើឲ្យខ្លួនឯងកាន់តែមានភាពច្នៃប្រឌិត។

៧) សៀវភៅ The Five Dysfunctions of a Team ៖ និពន្ធដោយលោក Charles Stransky ដែលសៀវភៅនេះផ្តោតសំខាន់ទៅលើបុគ្គលដែលជាមេដឹកនាំក្រុម ដោយលោកបានផ្តល់នូវចំណុចសំខាន់ៗជាច្រើន ដើម្បីផ្លាស់ប្តូរជំនាញភាពជាអ្នកដឹកនាំក្រុមរបស់អ្នកឲ្យកាន់តែល្អប្រសើរ។